كيف تتقدم للحلم خطوة؟

"To get something you never had, you have to do something you nerve did"

Les brown

اني مريم ، طالبة طب. دائماً اخذ الدراسة حجة في سبيل ما اسوي الشغلات الي احبها و أكول لنفسي انو ماعندي وقت. اضل احلم بأني رسامة ، اشارك بمعارض، انقل رسالة بلوحاتي. احلم واحلم و بعدين اگعد اگول مراح اگدر انفذ شي. وحتى ان كان عندي وقت فراغ، فاضيعة بغير امور واقنع نفسي انو ماطول حته بوقت فراغي ماعندي حافز انو ارسم، فاني ما احبة كفاية. لحدما قبل فترة

شفت مرتضى شخص مؤثر على الانستقرام سوة تحدي ٢٩ يوم من تطوير مهاراتك . ف گلت ليش لا، خلي ارسم كل يوم واشوف ليوين اوصل بنهاية المطاف. مخسرانة شي مو؟

اول ايام  جانت صعبة بلنسبة الي، لان جان بيها هواية فقرات جديدة و ممتعودة عليها ك انو اكتب مدونة واشارك بيها خطواتي بالتحدي! هذا الشي خلاني اطلع من منطقة الراحة مالتي (بعدين اكتشفت هذا من ضمن اهداف التحدي). انو اجرب شغلات جديدة واطلع من المعتاد. صعب وردت اتوقف هواية ايام من حسيت بعد مداتحمل كمية الضغط، بس كملت لان ببساطة "نقاوم ما نكره لننال ما نحب".  

وصلت لنص التحدي وبديت الاحظ التطور مو بس برسمي، وانما شلون دتمشي الامور وياية. بدة الرسم يصير روتين ، گمت حته ابقة كاعدة لحد ال٤ الفجر بس علمود ارسم. تفرجت فيديوهات هواية وعرفت انو عادي اذا ميجي الحافز، هوايه فنانين مو دائماً يجيهم و هذا جزء من العملية. حتة العوائق الي جانت كدامي، اكتشفت انو مموجودة بالواقع.

 خلصت هذا الشهر للنهاية، گدرت اسوي الچان بنظري مستحيل! مريم جانت مترسم حته ٣ ايام متواصلة. مفرحانة برسمي بگد ما فرحانة بالتزامي. طلعت اني احب الرسم كفاية، بس عدم وجود الحافز او الالتزام منعني انو اشوف هالشي! اني منعت روحي انو اشوف هالشي! وقت؟ بعز الفاينلات گعدت ارسم. لان اخذت وعد على نفسي والتزمت بي. فلتخلي الحافز سببك الوحيد للتقدم، لانو هو شي مؤقت. بينما الالتزام هوه الي راح يوصلك للمكان الي انتة تريدة.

 صحيح مشتركت بمعرض بعدني، او صرت رسامة محترفة مثلاً! بس هاي بداية تحقيق حلمي، وهاي بداية لكل واحد يقرة المدونة مستقبلاً. احلم، الحلم حلو. بس صير شجاع ولاحقة حته يعيش بداخلك و يصير حقيقتك. اتحدى روحك مثلي وكافئ نفسك على كل يوم اشتغلت بي. ابدأ مدونتك الخاصة ووثق كلشي تسوي، لان الكتابة راح تخليك تتعرف على نفسك اكثر. مراح اكتب سوالف التنمية البشرية مثل قاتل لاجل حلمك، وانت تستطيع وسوف تصل لان اتوقع گامت متجيب مفعولها الاصلي (على الاقل بنظري). وانما بس داكتب تجربتي الشخصية. اكبر ندم بحياتي انو مبديت ارسم من بعدني صغيرة، من جنت اعرف عندي القدرة انو اصير رسامة فد يوم. بس ماريد اكرر نفس الغلط مرتين، ماريد من يصير عمري ٧٠ سنة اگول " لو". بديت اشتغل من هسه. وانتة؟ شگد ناوي تنتظر يلا تبدي؟ شاركنة تجربتك…